Двое хуліганаў моцна збілі мужчыну на Каменнай Горцы — пацярпелы ў бальніцы, а падазраваныя ўжо ў СІЗА, паведамілі дзяржагенцтву «Мінск-Навіны» ў пракуратуры Фрунзенскага раёна сталіцы.
Ноччу ў Мінску кампанія маладых людзей адзначала дзень нараджэння, гарэлку ўжывалі ў тым ліку двое прыяцеляў 16 і 17 гадоў. Пасля святкавання яны пайшлі да знаёмага, які жыве на вуліцы Нёманскай.
З патрэбнага ім пад’езда выйшаў незнаёмы мужчына, які выпадкова зачапіў аднаго з хлопцаў плячом. Пачаўся канфлікт — прыяцелі папрасілі закурыць, але мінак адмовіў і пайшоў да таксі, якое яго чакала.
Хлопцы дагналі мужчыну і схапілі за капюшон, адцягнулі назад да пад’езда. Там яго жорстка збілі — не менш за 20 разоў ударылі рукамі і нагамі па галаве і целе. Пасля 44-гадовага пацярпелага з цяжкімі траўмамі забрала хуткая.
Вядома, што пасля карпаратыву ён праводзіў калегу і збіраўся на таксі вяртацца дадому.
Падазраваных затрымалі праз некалькі гадзін, на іх завялі крымінальную справу. Хлопцаў абвінавачваюць у наўмысным нанясенні цяжкага цялеснага пашкоджання (п. 7, п. 9 ч. 2 арт. 147 КК), іх узялі пад варту.
«Адзін з іх цалкам прызнаў віну. Яго суўдзельнік ад паказанняў адмовіўся, сваё дачыненне да інкрымінаванага злачынства адмаўляе», — пракаментаваў намеснік пракурора Фрунзенскага раёна Андрэй Сярбун.