У амерыканскай ваеннай акадэміі Вест-Пойнт ускрылі «капсулу часу» з помніка Тадэвушу Касцюшку, якая магла быць закладзеная туды амаль 200 гадоў таму. На расчараванне даследчыкаў, усярэдзіне аказаліся толькі пыл і аскепкі, паведамляе lohud.com. На гэтую навіну звярнула ўвагу «Радыё Свабода».
У канцы траўня гэтага года брыгада будаўнікоў разбірала трэснулы пастамент помніка Касцюшку ў акадэміі Вест-Пойнт (штат Нью-Ёрк, ЗША) і знайшла ўнутры скрыню. Амерыканскія навукоўцы і вайскоўцы прыйшлі да высновы, што гэта капсула часу, якую змясцілі туды курсанты акадэміі ў 1829 годзе.
Для вывучэння скрыні памерамі прыкладна 30×30×30 см запрасілі археолага, які задакументаваў і сфатаграфаваў артэфакт. Пасля гэтага супрацоўнікі кафедры фізікі і ядзернай інжынерыі ваеннай акадэміі вывучылі капсулу з дапамогай магутнага рэнтгенаўскага апарата, але даведацца пра змесціва капсулы нічога не ўдалося, бо скрыня была са свінцу.
Тады было прынятае рашэнне ўскрыць знаходку ў жывым эфіры на старонцы акадэміі на YouTube, што і зрабілі 28 жніўня.
Аднак даследчыкаў і ўдзельнікаў цырымоніі чакала расчараванне: унутры скрыня аказалася пустой, не лічачы пылу і некалькіх вапняковых аскепкаў.
Гісторык Вест-Пойнта Джэніфер Фойгтшыльд адзначыла, што шво на дне скрыні, падобна, трохі разышлося — гэта значыць, што змесціва магло падвергнуцца выветрыванню і ўздзеянню вады.
Яна падкрэсліла: нават калі скрынка аказалася пустой, сама яе наяўнасць у пастаменце помніка ўсё роўна падкрэслівае, наколькі важнай фігурай у гісторыі ЗША быў Тадэвуш Касцюшка.
Навукоўцы плануюць і далей вывучаць капсулу — магчыма, там знойдуцца схаваныя надпісы з мінулага.
Тадэвуш Касцюшка — ураджэнец Беларусі, удзельнік вайны за незалежнасць ЗША 1775−1783 гадоў і паўстання ў Рэчы Паспалітай 1794 года. Нацыянальны герой Беларусі, Польшчы і ЗША.
У ЗША ў 1778 годзе Джордж Вашынгтон прызначыў Касцюшку галоўным інжынерам для будаўніцтва ўмацаванняў у Вест-Пойнце, закліканых блакаваць праходжанне брытанскіх караблёў па стратэгічна важнай рацэ Гудзон.
