Кіраўніка беларускай дыпмісіі ў Варшаве выклікалі ў МЗС Польшчы з нагоды шпіёнскага скандалу, піша са спасылкай на свае крыніцы RMF FM. Тым часам кіраўнік МУС Польшчы звязаў адкрыццё пункта пропуску «Баброўнікі — Бераставіца» з вызваленнем Анджэя Пачобута, перадае «Польскае радыё».
Выклік беларускага дыпламата звязаны з раскрыццём сеткі шпіёнаў, якія працавалі на Расію, у Польшчы. Сярод затрыманых — трое беларусаў.
«Дыпламат пачуў рэзкі пратэст у сувязі са шпіёнскай дзейнасцю беларускіх грамадзян», — піша RMF FM.
Напярэдадні Аляксандр Лукашэнка, каментуючы шпіёнскі скандал у Польшчы, заявіў, што такім чынам Варшава «хапае людзей, каб прапанаваць Расіі ці Беларусі абмен на кагосьці». Ён адзначыў, што прапановы абмену ўжо былі.
Міністр унутраных справаў і адміністрацыі Польшчы Марыюш Каміньскі, адказваючы на пытанне пра гэта, не стаў падрабязна каментаваць словы Лукашэнкі. Аднак ён заявіў, што той «атрымаў вельмі выразны сігнал».
«Калі Анджэя Пачобута заўтра адпусцяць, пераход у Баброўніках будзе адкрыты паслязаўтра», — каротка сказаў ён.
Пры гэтым ён папярэдзіў, што калі беларускія ўлады будуць рабіць далейшыя крокі супраць польскай дзяржавы або супраць польскіх грамадзян, то Варшава будзе «вельмі жорстка рэагаваць».
Нагадаем, пункт пропуску «Баброўнікі — Бераставіца» на польска-беларускай мяжы з 10 лютага гэтага года афіцыйна прыпыніў афармленне транспартных сродкаў і асобаў, якія ідуць праз мяжу, на няпэўны час «у інтарэсах дзяржаўнай бяспекі».
8 лютага Гродзенскі абласны суд асудзіў журналіста, сябра пазбаўленага рэгістрацыі беларускімі ўладамі Саюза палякаў Беларусі Анджэя Пачобута на 8 гадоў калоніі ўзмоцненага рэжыму.