З 1 чэрвеня ў Беларусі павысілі субсідыяваныя тарыфы на электраэнергію, а таксама на ацяпленне і падагрэў вады. Нагадаем, для кватэр, у якіх ніхто не зарэгістраваны, а таксама для «дармаедскіх» тарыфы паднялі з 1 студзеня.
Як з 1 чэрвеня змяніліся тарыфы
Для абагравання жылля электраэнергіяй цяпер дзейнічаюць тры тарыфы.
Першы — аднастаўкавы, ён распаўсюджваецца як на абаграванне, так і на ўсе астатнія патрэбы. З 1 чэрвеня гэты тарыф паднялі да 0,1057 рубля (было — 0,0981 рубля). Рост — амаль 7,8%. Гэтым тарыфам могуць скарыстацца як уладальнікі прыватных дамоў, так і жыхары шматкватэрных. Для гэтага не трэба ставіць спецыяльны асобны лічыльнік ацяплення.
Калі ў чэрвені расходаваць электраэнергіі на 500 кВт∙г за месяц, то трэба будзе заплаціць 52,85 рубля. У траўні за гэты ж спажыты аб’ём было б 49,05 рубля.
Яшчэ адзін тарыф — дыферэнцычваны па двух часавых перыядах. Як і аднастаўкавы тарыф, гэты дзейнічае як на абаграванне, так і на ўсе астатнія патрэбы. Ставіць спецыяльны асобны лічыльнік ацяплення не трэба. У перыяд мінімальных нагрузак (з 23.00 да 6.00) з 1 чэрвеня ён складае 0,074 рубля за 1 кВт·г, а ў астатні час сутак — 0,1374 рубля за 1 кВт·г. У траўні тарыфы былі 0,0718 рубля і 0,1333 рубля адпаведна. Рост — на 3,1%.
Калі ў чэрвені расходаваць 500 кВт∙г за месяц (з 23.00 да 6.00), то трэба заплаціць 37 рублёў, а ў траўні за гэты ж аб’ём было б 35,9 рубля. Гэты тарыф дзейнічае на абаграванне і на ўсе астатнія патрэбы, спецыяльны асобны лічыльнік ацяплення ставіць не трэба.
Трэці варыянт — паставіць дадатковы спецыяльны лічыльнік, які цяпер лічыць выдаткаваную электраэнергію на ацяпленне па тарыфе 0,0449 рубля за 1 кВт·г з 1 чэрвеня. У траўні ён складаў 0,0398 рубля. Рост — 12,8%. Гэты тарыф мяркуе, што астатняя спажытая электраэнергія, у тым ліку на прыгатаванне ежы, мыццё, асвятленне дома, лічыцца па другім асноўным лічыльніку і аплачваецца па адным з наяўных тарыфаў — паводле аб’ёму або часу спажывання. Гэты тарыф у народзе называюць «тры капейкі».
Калі ў чэрвені расходаваць усё тыя ж 500 кВт∙г за месяц, то выйдзе 22,45 рубля, а ў траўні было б 19,9 рубля.
Як летась паднялі тарыфы, а потым «адкруцілі»
У 2022 годзе з 1 чэрвеня таксама павышалі субсідыяваныя тарыфы на ацяпленне і падагрэў вады. Але пазней урад адмяніў гэтае павышэнне. Таксама чыноўнікі «адкруцілі» назад цэннік на электраэнергію, якую выкарыстоўваюць для ацяплення жылля і падагрэву вады.