Прадстаўнік Аб’яднанага пераходнага кабінета па замежных справах Валерый Кавалеўскі сустрэўся з дарадцам кіраўніка Офіса Зяленскага Міхаілам Падалякам. Пра гэта беларускі палітык паведаміў у Twitter.
— Удзячны Міхаілу Падаляку за сённяшнюю плённую сустрэчу. Падтрымка Украінай Ціханоўскай і дэмакратычных пераходных сіл Беларусі мае ключавое значэнне для нашых намаганняў у аднаўленні свабоды і барацьбе з незаконным умяшаннем Расіі, якія падрываюць незалежнасць Беларусі, — напісаў Кавалеўскі.
Нагадаем, у канцы траўня з Падалякам і іншымі ўкраінскімі чыноўнікамі сустрэўся таксама кіраўнік Народнага антыкрызіснага ўпраўлення і прадстаўнік Аб’яднанага пераходнага кабінета па транзіце ўлады Павел Латушка.
У каментары «Люстэрку» ён расказаў, што абмеркаваў у Кіеве пытанні стратэгіі, падрыхтаваную НАУ справаздачу пра дэпартацыю і незаконнае перамяшчэнне ўкраінскіх дзяцей і датычнасць да гэтага Лукашэнкі. Пры гэтым, паводле яго, з беларускімі ўладамі афіцыйны Кіеў не падтрымлівае ніякай камунікацыі.
А сама Святлана Ціханоўская ў сярэдзіне траўня сустрэлася з Уладзімірам Зяленскім на ўручэнні прэміі Карла Вялікага ў Германіі. Прэзідэнт Украіны вітаў Ціханоўскую, таксама палітыкі паціснулі рукі.
Да гэтага паміж беларускімі дэмакратычнымі сіламі і ўкраінскімі ўладамі практычна не было прыкметных кантактаў на высокім узроўні. У прыватнасці, Валерый Кавалеўскі адзначаў, што Кіеў блакуе ўдзел Ціханоўскай у сумесных мерапрыемствах.
Тым не менш пасля візіту Латушкі ў Кіеў прадстаўнік АПК заявіў, што бачыць «добрыя пасылы» з боку Зяленскага і іншых афіцыйных прадстаўнікоў Украіны. Ён адзначыў, што беларускія дэмсілы вядуць «дастаткова эфектыўную і пастаянную камунікацыю» з Кіевам, і выказаў надзею на павышэнне ўзроўню палітычных адносін.