Пасол Беларусі ў Кітаі Юрый Сянько пайшоў у адстаўку. Гэта вынікае з указа Аляксандра Лукашэнкі, апублікаванага на Нацыянальным прававым інтэрнэт-партале.
«…Вызваліць Сянько Юрыя Аляксеевіча ад пасады Надзвычайнага і Паўнамоцнага Пасла Рэспублікі Беларусь у Кітайскай Народнай Рэспубліцы ў сувязі з выхадам у адстаўку», — гаворыцца ў дакуменце.
Нагадаем, Юрыю Сянько 56 гадоў. Да свайго прызначэння на пасаду пасла Беларусі ў Кітаі ў лістападзе 2020 года шэсць гадоў прапрацаваў старшынёй Дзяржаўнага мытнага камітэта Беларусі.
20 лістапада Аляксандр Лукашэнка прызначыў новым паслом Беларусі ў Кітаі Аляксандра Чарвякова, які займаў да гэтага пасаду міністра эканомікі Беларусі.