Урад Беларусі яшчэ мацней пашырае рэгуляванне цэн на платныя медыцынскія паслугі. Гэта прадугледжвае пастанова Саўміна № 596 ад 15 жніўня, якая ў пятніцу была афіцыйна апублікаваная на Нацыянальным прававым інтэрнэт-партале.
У пералік платных медыцынскіх паслуг, тарыфы на якія рэгулююцца Міністэрствам аховы здароўя пасля ўзгаднення з Міністэрствам антыманапольнага рэгулявання і гандлю, уводзіцца новы пункт — «прыёмы (кансультацыі) дактароў-спецыялістаў».
Такім чынам, цяпер прыватныя медыцынскія клінікі не змогуць самастойна выстаўляць цану за звычайны прыём у доктара.
Новаўвядзенне набудзе моц з 1 лістапада 2024 года.
Нагадаем, 1 лістапада 2023-га пачало працаваць рэгуляванне цэн на стаматалагічныя паслугі — Мінздароўя вызначыла памежныя тарыфы. Лячэнне зубоў тэарэтычна мусіла стаць для беларусаў таннейшым, але не стала. Нават прэм’ер-міністр Раман Галоўчанка прызнаў, што рэгуляванне цэн на стаматалагічныя паслугі «пакуль не дало патрэбнага эфекту».
Пасля гэтага ў траўні 2024 года былі вызначаныя нормы часу і расходу матэрыялаў у платнай стаматалогіі. Гэтая рэгуляцыя пачала дзейнічаць з 1 ліпеня, чыноўнікі спадзяюцца, што яна нарэшце дапаможа знізіць цэны на лячэнне зубоў.
Разабрацца з цэнамі на платныя медпаслугі ў пачатку 2024 года абяцаў новы кіраўнік Мінздароўя Аляксандр Хаджаеў пасля прызначэння на пасаду. У выніку ў траўні была прынятая пастанова пра абмежаванне рэнтабельнасці яшчэ шэрагу медыцынскіх паслуг.
Акрамя стаматалогіі ў спіс трапілі паслугі дыягностыкі (лабараторнай, прамянёвай, ультрагукавой, функцыянальнай і эндаскапічнай), а таксама медкамісія і выдаванне даведак пра тое, што чалавек можа кіраваць транспартнымі сродкамі. Менавіта да гэтага спісу цяпер дададзеныя і медыцынскія кансультацыі.