Камітэт дзяржаўнай бяспекі занёс у пералік «асоб, якія маюць дачыненне да тэрарыстычнай дзейнасці», яшчэ сем прозвішчаў — цяпер іх колькасць пераваліла за тысячу.
У абноўленым 30 студзеня «тэрарыстычным» спісе, які цяпер складаецца з 1003 пазіцый, з’явілася сем новых прозвішчаў.
Шасцёра — грамадзяне Беларусі: Аляксандр Лыцін, Таццяна Карповіч, Сяргей Мацюхевіч, Андрэй Шульгат, Дзмітрый Лагодзіч і Сяргей Захаранка. Усе яны прызнаныя вінаватымі і адбываюць прысуд па арт. 130 КК (Распальванне расавай, нацыянальнай, рэлігійнай альбо іншай сацыяльнай варожасці).
Сёмы — пакістанец Абдул Рахмана Макі, які ўнесены ў санкцыйны пералік Савета бяспекі ААН па ІДІЛ і «Аль-Каідзе» як тэрарыст, якога расшукваюць па ўсім свеце.
Макі займаў найвышэйшыя пазіцыі ў тэрарыстычнай арганізацыі «Лашкар-е-Тайба» — самай вялікай і актыўнай групоўцы ў Паўднёвай Азіі, на рахунку якой мноства тэрактаў у Індыі. Самы крывавы з іх — атака на Мумбаі, вынікам якой стала гібель 195 чалавек і раненне яшчэ 300.
У ЗША за інфармацыю пра яго прапануюць узнагароду да 2 мільёнаў даляраў.