Анестэзіёлага-рэаніматолага прыватнага медцэнтра «Ладэ» Цімура Лазко, затрыманага ў лютым, пачнуць судзіць 4 ліпеня. На судовы расклад звярнула ўвагу «Наша Ніва».
Працэс пачнецца 4 ліпеня ў Ленінскім судзе Брэста, весці яго будзе суддзя Аляксандр Семянчук. Цімура Лазко абвінавачваюць па ч. 1 і 2 арт. 290−1 КК «Фінансаванне тэрарыстычнай дзейнасці». Максімальны тэрмін пакарання па гэтым артыкуле — да 15 гадоў пазбаўлення волі.
Як мы расказвалі раней, «пакаяльнае відэа» медыка апублікаваў 2 лютага набліжаны да ГУБАЗіК тэлеграм-канал.
Затрыманага змусілі прызнацца ва ўдзеле ў несанкцыянаваным пікеце, распаўсюдзе «экстрэмісцкіх» матэрыялаў, а таксама ў пералічэнні данатаў у тэлеграм-канал NEXTA.
Сілавікі ўдакладнілі, што ўсе сабраныя матэрыялы былі перададзеныя ў КДБ, і прыгразілі затрыманаму пазбаўленнем волі на тэрмін ад 8 да 12 гадоў.
Як піша «Вясна, Брэст», Цімур Лазко да 2020-га працаваў анестэзіёлагам у Брэсцкай абласной бальніцы. У кастрычніку 2020 года пасля яго затрымання калегі выходзілі на пратэст «Я/мы Цімур». Падчас рэферэндуму ў лютым 2022 года Цімура Лазко зноў затрымалі, па арт. 24.23 КаАП «Незаконнае пікетаванне» ён спачатку адседзеў у ІЧУ, а потым атрымаў штраф памерам 50 базавых адзінак.