У Беларусі — нечуваны прыток пацыентаў з грыпам, прычым дзеці пераносяць захворванне цяжэй і часта сутыкаюцца з ускладненнямі. Пра сітуацыю ў паліклініках «Нашай Ніве» расказаў педыятр, які таксама падзяліўся прагнозам наконт таго, калі захворвальнасць пойдзе на спад.
Педыятр адзначае, што апошні тыдзень у яго поўны калідор людзей — такога спецыяліст яшчэ ніколі не бачыў. Ён кажа, што пабачыў, здаецца, усіх дзяцей на сваім участку — нават тых, хто звычайна з’яўляецца ў доктара толькі па нейкую даведку, бо амаль не хварэе.
— Па адчуваннях, хварэюць усе. Грып — у 100% выпадкаў, я б сказаў. Пры гэтым дзеці доўга не папраўляюцца. Шмат бранхітаў — класічных, пнеўмакокавых, якія ідуць як бактэрыяльнае ускладненне пасля грыпу.
Па словах спецыяліста, пачынаецца грып тыпова: моцна баляць галава і ногі (у некаторых выпадках бацькі нават кажуць, што дзіця не дойдзе да паліклінікі), вялікая тэмпература, пад 40, якая не збіваецца. На фоне такой тэмпературы даволі часта, бывае, і ванітуе.
— Бывае, што, здаецца, сітуацыя нармалізуецца, на выходных два дні тэмпературы няма. А ў панядзелак усё пачынаецца зноў. Плюс кашаль, дабаўляюццы хрыпы. У кагосьці пачынаецца бранхіт, у кагосьці пнеўманія, у кагосьці атыт.
Доктар прагназуе, што пасля вясенніх канікул (яны ўжо пачаліся) сітуацыя пачне лепшаць, а ў красавіку захворванне на грып пойдзе на спад.
А на будучыню спецыяліст заклікае загадзя рабіць прышчэпкі ад грыпу. Бо, па яго назіраннях, тыя дзеці, якія мелі прышчэпкі, сёлета хварэюць лягчэй.
Тэрапеўты, якія працуюць з дарослымі, адзначаюць, што ў іх такой жахлівай сітуацыі не назіраецца.
Як сцвярджаюць у Мінздраве, зараз у Беларусі эпідэміялагічная сітуацыя па захваральнасці на вострыя рэспіраторныя інфекцыі (ВРІ) ацэньваецца як кантралюемая, адзначаецца паступовы прырост колькасці хворых. Дзеці складаюць каля 58% ад усіх захварэлых.
Вынікі лабараторных даследаванняў біялагічнага матэрыялу дазваляюць казаць пра цыркуляцыю вірусаў грыпу A (H1N1) і А (H3N2), В, а таксама негрыпозных рэспіраторных вірусаў (вірусы парагрыпу, адэнавірусы, рынавірусы, рэспіраторна-сінцывіён ы SARS-CoV-2) і бактэрыяльнай флоры.
«Узровень захворвання на ВРІ ніжэй за эпідэмічны, але прафілактыка вострых рэспіраторных інфекцый па-ранейшаму застаецца важнай і неабходнай», — заявілі ў міністэрстве.
