Як мінімум 38 чалавек загінулі і 130 пацярпелі ў выніку сутыкнення пасажырскага і грузавога цягнікоў у Грэцыі ў ноч на 1 сакавіка. Некалькі вагонаў пасажырскага саставу сышлі з рэек, у іх пачаўся пажар, паведамляе грэцкі канал EPT.News.
Сутыкненне двух цягнікоў, якое таксама прывяло да пажару і шматлікіх ахвяраў, здарылася незадоўга да поўначы ў аўторак недалёка ад грэцкага горада Ларыса.
Пасажырскі цягнік, у якім былі 350 чалавек, выконваў рэйс з Афін у Салонікі, насустрач яму ішоў грузавы састаў, які накіроўваўся з Салонікаў у Ларысу. Пры гэтым цягнікі аказаліся на адных рэйках і ўрэзаліся адзін у аднаго.
Тры вагоны пасажырскага цягніка сышлі з рэек, два з іх цалкам разбураныя. У іх пачаўся пажар. Паведамляецца пра 38 загінулых і 130 параненых, 66 чалавек дастаўленыя ў бальніцы, шасцёра з іх знаходзяцца ў рэанімацыі. Яшчэ шэсць чалавек лічацца зніклымі без вестак.
Ратавальная аперацыя працягваецца. На месцы аварыі працуюць 150 пажарных з дапамогай 17 аўтамабіляў і чатырох кранаў і каля 30 машын хуткай дапамогі.
Паліцыя затрымала начальніка станцыі ў Ларысе, у чыю змену адбылося крушэнне, аднаго з работнікаў і прадстаўніка чыгуначнай кампаніі. Цяпер высвятляецца, пры якіх абставінах абодва саставы аказаліся на адных рэйках. Паводле адной з версій, гэта адбылося праз тое, што пасажырскі цягнік накіравалі па няправільнай ветцы — той, па якой ішоў грузавы.
Рашэннем прэм’ер-міністра Грэцыі Кірыякаса Міцатакіса абвешчаная трохдзённая нацыянальная жалоба па ахвярах чыгуначнай катастрофы.