Масгарсуд асудзіў былога «міністра абароны ДНР» і былога супрацоўніка ФСБ Ігара Стралкова (Гіркіна) на чатыры гады калоніі агульнага рэжыму па справе пра публічныя заклікі да экстрэмізму, перадае «Інтэрфакс».
Слуханні прайшлі ў закрытым рэжыме. Ігар Стралкоў не прызнаў віны.
Пракурор у спрэчках прасіў асудзіць Ігара Стралкова на 4 гады 11 месяцаў калоніі агульнага рэжыму.
Нагадаем, у 2014 годзе Ігар Стралкоў (Гіркін) быў адным з лідараў незаконных узброеных фарміраванняў на Данбасе, нейкі час быў «міністрам абароны» самаабвешчанай ДНР. Ён завочна асуджаны ў Гаазе на пажыццёвае зняволенне за збіты над Украінай у 2014 годзе «Боінг» з 298 пасажырамі.
Пасля поўнамаштабнага ўварвання Расіі ва Украіну ён стаў адным з самых заўзятых крытыкаў метадаў вядзення вайны. У красавіку 2023 года СМІ паведамлялі, што Гіркіна правяраюць па артыкуле пра «дыскрэдытацыю» Узброеных сіл Расіі. Яго затрымалі 21 ліпеня 2023 года і адправілі ў СІЗА праз два пасты ў яго тэлеграм-канале, у якіх ФСБ знайшла заклікі да экстрэмізму (ч. 2 арт. 280 КК РФ). Сам Стралкоў прасіў адправіць яго пад хатні арышт праз дыягнаставаную стэнакардыю другой ступені і неабходнасць прымаць прэпараты.
У лістападзе мінулага года ён заклікаў сваіх прыхільнікаў сфармаваць штаб для падтрымкі яго на выбарах прэзідэнта вясной 2024 года. Аднак ягоная ініцыятыўная група не змагла падаць дакументы ў Цэнтрвыбаркам праз адсутнасць подпісу Ігара Стралкова, які быў пад арыштам у СІЗА «Лефортава».
Чытайце таксама
