Польскія яблыкі завозіць у Беларусь сёлета можна будзе толькі ў ліпені — праз контрсанкцыі Мінска супраць «недружалюбных» краін. «Люстэрка» паглядзела, якія яблыкі прадаюць у беларускіх інтэрнэт-крамах, ці ёсць польскія і за колькі.
У «Е-дастаўцы» ў наяўнасці тры віды яблыкаў: два з Польшчы, адзін — з Малдовы. Польскія прадстаўленыя гатункамі «Рэд Прынц» і «Рэд Чыф», першы каштуе 2,99 рубля за кілаграм, другі — 4,63 рубля. Дарэчы, цана на яблыкі з Малдовы — 2,99 рубля.
У дастаўцы «Алмі» ёсць яблыкі чатырох гатункаў, тры з іх — з Польшчы. Так, два віды чырвонага колеру з гэтай суседняй краіны прадаюць па 3,99 рубля за кілаграм, а адзін жоўты гатунку «Голдэн» — за 4,99 рубля.
«Гіпа» прадае два гатункі яблыкаў, абодва — з Польшчы: жоўтыя «Голдэн» — за 5,01 рубля і чырвоныя «Рэд Чыф» — за 5,18 рубля за кілаграм.
На вітрыне крамы «Грын» ёсць чатыры віды яблыкаў. Адзначана, што ўсё гэта імпарт, але не паведамляецца, з якіх краін. Цэны — ад 3,29 да 4,49 рубля за кілаграм. Гэта цана з улікам зніжкі, яна дзейнічае на ўвесь асартымент.
У магілёўскай інтэрнэт-краме «Перекресток» прадаюць чатыры гатункі яблыкаў, усе яны з Польшчы. Цэны за кілаграм такія: «Рэд Прынц» — 3,53 рубля, «Мутсу» — 4,21 рубля, «Голдэн» — 4,02 рубля, «Рэд Чыф» — 3,97 рубля.
Нагадаем, контрсанкцыі, якія забараняюць увозіць прадукты харчавання з «недружалюбных» краін, увялі 1 студзеня 2022 года ў адказ на абмежаванні Захаду. Пасля гэтага абмежаванні ўжо тройчы падаўжалі. Першапачаткова пад забаронай былі мяса свежае, астуджанае і замарожанае буйной рагатай жывёлы, свініны і хатняй птушкі, субпрадукты, тлушчы, каўбасы, мяса салёнае, у расоле, сушанае або вэнджанае, харчовая мука з мяса ці мясных субпрадуктаў, малако і малочная прадукцыя, гародніна, садавіна і арэхі, кандытарскія вырабы, соль. Але паступова некаторыя прадукты з яго выключалі. Сярод іх — абрыкосы, вішня, чарэшня, нектарыны, слівы, хурма.
У канцы чэрвеня гэтага года ўрад, трэці раз падаўжаючы харчовыя контрсанкцыі, захаваў забарону на ўвоз з «недружалюбных краін» яблыкаў. Увозіць іх можна будзе толькі ў ліпені. Таксама ўводзіцца забарона на ўвоз з Літвы і Польшчы піва і слабаалкагольных напояў. Прадуктовае эмбарга падоўжылі да 31 снежня 2023 года ўключна.
Характэрна, што польскія яблыкі раней ужо падпадалі пад харчовыя контрсанкцыі Мінска, аднак неўзабаве гэты тавар выводзілі з-пад абмежаванняў. Часцей за ўсё ў продажы можна знайсці яблыкі менавіта з гэтай суседняй краіны. Часта яны таннейшыя, чым аналагі з іншых дзяржаваў. У сітуацыі, калі нашыя фермеры і іншыя вытворцы яблыкаў, а таксама гандаль не заўсёды могуць забяспечыць унутраны рынак айчыннай прадукцыяй, рытэйлу давядзецца шукаць іншыя варыянты, з якіх краін пастаўляць гэты тавар. Гэта можа адбіцца на рознічных цэнах, бо польскія — адны з самых бюджэтных.
Чытайце таксама
